Rom 11 | KYG | STEP | Ani gemo hu'niya'mofe'mo nagaemo hu'nae'mo, Goti'a vaya'amo alagi alino hapa faino apatale'nifiye. Ha'ao, alagi atalegeno hano hino. Ani gee'mo hu'nae'mo, nagaemo Emalehamu aginago'amo mai'ne'na Menisameni nofi vayapati'mo Isaleli vekamo mai'nove.

Romans 11

1 Ani gemo hu'niya'mofe'mo nagaemo hu'nae'mo, Goti'a vaya'amo alagi alino hapa faino apatale'nifiye. Ha'ao, alagi atalegeno hano hino. Ani gee'mo hu'nae'mo, nagaemo Emalehamu aginago'amo mai'ne'na Menisameni nofi vayapati'mo Isaleli vekamo mai'nove. 2 Goti'a ema akeya'vilaga huno'ae'mo, mafa'ne'nimo mai'nae, huno hu'niya vaya'mo alino o'apatale'niye. Goti mukufi avo kae male'niya gemo'a Ilaiyafe'mo ava gemo hu'niya gemo lapakaemo afi'nafiye. Ilaiya'a Gotife'mo, 3 Ala kava nene, huno, apakaemo kagaetegati gemo alini'e'a ae'a hakalo hu'a hapa nepaiya vaya'mo ago apamagi'nage'a falige kagae ofalinimo ali'a ne'malaya yafa hi'yalamu'mo ali'a halagape vai'a atalege hu'nage'na nagai'nige'mo mai'noge'apae'mo hemenimo kamiti namagigefe'mo kahauya nehae, huno huteno agoti huno apate'niye. 4 Ani gemo hu'niya'monanafa Goti'a ge'ale'mo aeno atagaina huno ha paino'ae'mo,nagaemo seveni tauseni'a vaya'aite'mo alagepa hu'na yagai'na ne'apatoge'apae'mo aigofe goti'apimo'a Mealofe'mo mono osu'nae, huno ha pai'niye. 5 Goti'a fiku hapa maeno lekana paino apate'niya'mofe'mo hemenimo ani kava hu'a asole vayapati'mo logufa vaya'mo mai'nae. 6 Fiku hapa maeno apami'neno'ae'mo lekana paino apate'niya'mofe'mo alagepa kava'apilefe'mo lekana paino o'apate'niye. Alagepa kava'apilefe'mo lekana paino apateyesinana fiku hapa maeno no'apamiyesine. Alagepa kava'apimo anona'apilefe'mo alino ne'apamiya kava'e fiku hapa maeno ne'apamiya kava'e'mo alu kava alu kava'mo hane'na'ae. 7 Ani kava nehiya'mofe'mo na kavafe'mo ava gemo hane'niye. Isaleli vaya'amogimo kahauya hu'nayana o'ali'nae. Lekana paino apate'niya Isaleli vaya'amogige'mo ali'naya'monanafa mago'e asole Isaleli vaya'mogi apaipamo'mo lokiya vai'niye. 8 Ani kavatefe'mo mago avo kae male'niya gemo'a huno'ae'mo,

Goti'a apaipamo alino havaeno ategekana huno apateteno o'agesaya apaulagamo alino hamaleno apateteno o'afisaya apakesa alino apami'nige'apae'mo ani kava hu'a maime maime e'a hemeni'e'mo mai'nae,
huno hu'niye. 9 Ani kavatefe'mo Nevini'a huno'ae'mo,

hosu kava'mo anona'apilefe'mo ne'ya'mo ne'naya ne'ya'mo'a apane'mu aegekana huge ane'aifi'mo hegekana huge yafapi'mo apaiyamo fai'a lo aete'a heleve nehaya kavakana huno hapaegaiye. 10 O'agesayafe'mo apaulagamo'mo hani'age hino. Lusi kanamo alika apamige'apao alite'a muki afina'mo ape hulitata hu'a maiyo,
huno hu'niye.

Henaga'amo Isaleli vaya'mo haiya kava hu'a maisafi huno hu'niya gemae.

11 Inagi Yu vaya'mo alagi asagau'a aisayafe'mo apaiyamo fai'a lo aete'a heleve hu'nafiye. Ha'ao, alagi atalegeno hano hino. Heleve hu'a asagau'a ai'naya kavateti'mo Goti'a alu nofi vaya'ai apakufamo alino katino apate'niye. Isaleli vaya'mogimo apaipa kafa hapaesayafe'mae. 12 Ma mopafi'mo mai'naya vaya'mogimo asagau'a ai'naya kavateti'mo lusi kagemi ya'mo ne'aliye. Malaga nofi vaya'mogi alagepa ya'apimo atale'naya kavateti'mo lusi kagemi ya'mo ne'aliye. Ne'aliya'mofe'mo muki Yu vaya'ai apakufamo alino katino apatesiya kavateti'mo na agufa kagemi ya'mo aligae. 13 Apa veka'amo mai'ne'na alu nofi vaya'mogitapalegamo ne'uva'mofe'mo hemenimo alu nofi vaya'mogitapae'mo mani gemo hugesuve. Ma mopafi kavatefe'mo hu'nae'mo, nofi vaya'nimogi lapakete'apae'mo hapa'ye hisige'na apakufamo ali'na kati'na apatesuvafe'mo alu nofi vaya'mogitapalegamo lusi ali'ya'mo ne'aluve. 15 Goti'a Yu vaya'mo apatale'niya kavateti'mo muki ma mopafi vaya'mo alino nanu aeno ne'apatesiya'mo'mo agaetegamo esageno alino falu huno apatesiya kavateti'mo na kava afole aigiye. Vae, hu'na, fali'nayateti'mo alino he tino ne'apateya agufa kava'mo afole aigiye. 16 Mago vaya'mogimo okae'nisaya peleti mayamo ali'a lo ae'a magokayaga atupa'amo kaete'a Goti'mo ofalinimo ami'nisayana magokayaga atupa'a'e'mo aote ya'mo hane'niya'mofe'mo Goti'a agai'a ya'age'mo hane'niye. Ani kava huno yosa hafu'ya'amo Goti'a agai'a ya'mo hane'nisiya'mo'mo yosa akopa'a'e'mo Goti agai'a ya'mo hane'niye. 17 Goti'a hoyafi'mo hane'niya yosamo agi'amo olivi yosa akopamo alino lo aeno ataleteno kahaufilaga olivi yosa akopamo alino lo aelineno aeno hanino ate'niye. Lapakaemo alu nofi vaya'mo kahaufilaga yosagana hutapa mai'nae. Hemenimo lapakaemo yosa akopa'a'e'mo lokaetapa mai'netapae'mo hafu'ya'afati'mo yosa anumo ne'aligeno alino lokiya vaino nelapate. 18 Lapakaemo alino lo aeno atale'niya yosa akopa'ae'mo, aeta agase'none, hutapa osiyo. Ani agufa himu'namu gemo osutapa, lagaemo yosa hafu'ya'amo alita lokiya vaita no'atonageno'ae'mo alino lokiya vaino nelate, hutapa lapakesa afiyo. 19 Lapakaemo ge'nile'mo aetapa atagaina huta naha paitapae'mo, Anonale'mo maisunafe'mo akopamo alino lo aeno atale'niye, hutapa hugae. 20 He, lama gemo hu'naya'monanafa Kalaisife'mo apakesa afi'a fatago osu'naya'mofe'mo alino lo aeno apatale'nigetapae'mo lapakaemo lapakesa afita fatago nehaya kavatapiletike'mo afa'a ne'maiye. Himu'namu kava'mo osutapa kolige'mo hutapa maiyo. 21 Goti'a yosa'afati'mo agai'amo ae'niya yosa akopamo alino lo aeno atalesiyafe'mo agegeno o'ate'niya'mofe'mo lapakesa afita fatago osisayana ani kava huno lapakegeno olapatalegaifa alino lapafaino lapatalegaiye.

22 Goti'a ani kava'mo hu'niya'mofe'mo yuna aipamo kalino nelapateya kava'a'e lokiya aipamo kalino ne'apateya kava'a'efe'mo lapakesa afiyo. Agaemo asagau'a ai'naya vaya'aife'mo lokiya aipamo kalino ne'apateya'monanafa lapakaefe'mo yuna aipamo kalino nelapate. Lapakaemo yuna aipamo kalino nelapateya kava'afi'mo maime maime ne'visayana yuna aipamo kalino lapategaiya'monanafa atalesayana Goti'a ani kava huno lapakae'e'mo alino lo aeno lapatalegaiye. 23 Apakaemo halate apakesa afi'a fatago hisayana apavalelino eno no'apile'mo aeno hanino apategaiye. Halate Goti'a afa'a alino aeno hanino apategaiye. 24 Goti'a kahaufilaga hane'niya yosafati akopamo alino lo aelino eno hoyafi'mo hane'niya yosafi'mo aeno hanino lapate'niye. Alu yosa akopamo ali'a lo aeli e'a akopa o'ae'niya yosafi'mo ae'a hani'a ae'a kamae'a no'atae. Goti'a ani kava'mo hu'niya'mofe'mo hoyafi hane'niya yosa akopa'amo agai'a ae'niya yosa akopamo no'ale'mo halate alinino eno aeno hanino aeno kamaeno atesiyafe'mo lokiya ali'ya'mo ohane'niye.

Goti'a muki Isaleli vaya'ai apakufamo alino katino apatesiya kavafe'mo hu'niya gemae

25 Konaga'nimogitapae, alagepa huta afi'none, huta hutetapa himu'namu kava'mo osisayafe'mo mago fala ki'niya gemo lapa paisugetapa afisayafe'mo nahau'niye. Goti'a mago Isaleli vaya'ai apakesa aino akani male'nige'a ge'amo o'afi'a maime maime ne'visage'apae'mo mago alu nofi vaya'mogimo Goti kegi'yafi'mo fale'a haite haite hu'a hai'a lekana pai male'niya vaya'amo alagi afole aigae. 26 Goti'a ani kava huno muki Isaleli vaya'ai apakufamo alino katino apategaiye. Ani kavatefe'mo Goti mukufi'mo hu'niya gemo'a huno'ae'mo,

Apakufamo alino katino apatesiya vekamo Saiyoni kotegati'mo eno muki Yekopu aginago vaya'ai hosu kava'apimo alino atalegaiye. 27 Ani kotalake gemo ago hapa pai'nove. Henaga'amo hosu kava'apimo ali'na atalegauve,
huno hu'niye. 28 Yu vaya'mogimo alagepa faigoko ge'amo no'afiya'mofe'mo lapakaemo apakae note'mo etapa maisayafe'mo Goti kame'amo mai'nae. Mai'naya'monanafa Goti'a lekana paino apateteno apakinago vaya'aife'mo kotalake ge'amo hu male'niya kavatefe'mo hau ayamopafi'mo nehaiya vaya'amo mai'nae. 29 Goti'a apami'niya ya'mo halate hapa ofalegaiye. Keya aeno ge hu'niya kavatefe'mo halate alu agesa o'afigiye. 30 Lapakaemo mago afina'mo Goti ge'amo o'afi'naya kava hu'a hemenimo Yu vaya'mogi Goti ge'amo no'afiya'mofe'mo Goti'a lapakaefe'mo hau huno lapate'niye. 31 Ani kava'mo hu'a Goti ge'amo no'afiya'mofe'mo hau huno lapate'niya agufa kavateti'mo hau huno apategaiye. 32 Goti'a muki vaya'aife'mo hau huno apatesiyafe'mo muki vaya'mo alino apatale'nige'a ge'amo no'afiya kavategamo u'a ne'maiye.

Gotife'mo hao ke hegetao, huno hu'niya gemae

33 Vae, hu'na, solovala ani'mo lusi vasilonamo hane'niya kavakana huno agesa ne'afiya kava'e afiteno ali'ya'mo ne'aliya kava'e'mo vasilonagana huno hane'niye. Lagaemo kahauya huguna'monanafa alagi agae aipa agesa o'agegaune. Ina la'mo ali'ya'mo ne'aliya kava'amo aepa'amo agegaiye. 34 Ani kavatefe'mo Goti ge'amo'mo huno'ae'mo,

Ina la'mo Ala kava ne'mo'a agesa ne'afiya ya'mo age'niye. Ina la'mo alino aya ne'male. 35 Ina la'mo Goti'mo mago ya'mo alino ami'nigeno anona'amo hane'niye,
huno hu'niye. 36 Goti'a muki ya'mo aepa vekamo mai'nigeno muki ya'amo agaetegatike'mo afole ne'aiye. Muki ya'amo agaeteti'mo hemenimo hane'nigeno yagaino ne'ate. Agai'alefe'mo muki vaya'e ya'a'e'mo afole ai'nae. Muki vaya'mogimo muki afina'mo agi'ale'mo ali'a asaga huge asaga huge hu'a maiyo. He, lama ge.